ስዉእ ተጋዳላይ ብርሃነ ጋኖ - TPLF Martyr Brhane Gano

TPLF Martyr Brhane Gano/ Halefay

ኣርቲስት ተጋዳላይ ብርሃነ ጋኖ ካብ ኣቡኡ ኣይተ ገ/መስቀል ተፈሪን ካብ ኣዲኡ ወ/ሮ ይሕደጋ በየነን ብ1961 ዓ.ም ኣብ ተምቤን ከተማ ዓቢዓዲ ተወሊዱ:: ፀረ ደርጊ ኣብ ዝካየድ ዝነበረ ወፍሪ ተጋድሎ ገና ብዕሸሉ ኣብ ሰገናት ህ.ወ.ሓ.ት ሓይሊ 84 ተጠርኒፉ ብመልክዕ ባህሊ ንህዝብን መናእሰይን እናለዓዐለ ከቃልስን ክቃለስን ድሕር ምፅናሕ ብዝሓድሮ ወነን ስምዒትን ኣብ 1973 ዓ.ም ናብ መስርዕ ህ.ወ.ሓ.ት ተፀንቢሩ:: ብዝነበሮ ፉሉይ ተውህቦ ባህሊ ተሓርዩ ኣብ 1974 ዓ.ም ኣብ ጉጅለ ባህሊ ተጠርኒፉ ክሳብ ዕለተ ሞቱ ዘይርሰዑ ምህዞታት ብምቕራብ ተጋዲሉን ኣጋዲሉን'ዩ::

ኣርቲስት ተጋዳላይ ብርሃነ ጋኖ ኣብ ወፍሪ ቀይሕ ኮኾብ 1974ዓ.ም ናብ ኤርትራ ምስዝከዳ በራጊድ ከይዱ "ህንፅቲ ዕርደይ ዋሕስ ሂወተይ:ኣነ ንዓኺ ንስኺ ናዓይ ይበል ምትሕልላይ" ዝብል ዜማ ብምዝያም ሻብኡ ንዝነበረ ፅንዓት ተጋዳላይ ብኪነታዊ ክእለቱ ብምልዕዓል ነቲ ወፍሪ ኣብ ምዕዋት ተሩኡ ፈፂሙ እዩ::
ኣርቲስት ተጋዳላይ ብርሃነ ሓለፋይ ንፅንዓትን ተዓዋታይነትን ተጋዳላይ ወየንትን ሽግ ወየንትን ኮታ ንመሪር ተጋድሎን መስዋእትን እንትገልፅ ማእኸል ኩሎም ናይ ኪነት ሸውሃት ዝኾነት "ንገርኒ'ንዶ ሓለፋይ" ዝብል ሙዚቃዊ ድራማ ብምቕራብ ብፍላይ ብናይ ኣቀራርባ ምህዞኡ ልዕሊ ስምዒቱ ዝሕንዝሕ እንዳነበዐ ንህዝቢ አሐሪኑ! መንእሰይ ትግራይ ንገምባለ ኣቡኡ ኣልዒሉ ክጋደል ዝገበረ ኣብ ልዕሊ ህዝቢ ካብ ዝሰፈሩ ስሙያት ተጋደልቲ ሓደ እዩ ነይሩ:: ካብዛ ሙዚቃዊ ድራማ ብምብጋስ ድማ ሷጋ ብርሃነ ጋኖ ናብ ብርሃነ ሓለፋይ ተቐይሩ::
ኣርቲስት ተጋዳላይ ብርሃነ ሓለፋይ ድሕሪ ውድቀት ደርጊ'ውን በቲ ፉሉይ ተውህቡኡ ህዝቢ ናብ ልምዓት ክዓስል: መናእሰይ ሕድሪ ኣያታቶም ክወርሱ ብዙሓትን ዘይርስዑ ሙዚቃዊ ድራማታትን ምቕራብን:ወየንቲ ደርፍታት ብምድራፍን ክሳብ ዕለተ ሞቱ ብዘይዕረፍቲ ዝተረባረበ ወዲ ህዝቢ እዩ ነይሩ::
ምክትል ኮማንደር ኣርቲስት ተጋዳላይ ብርሃነ ሓለፋይ ባዓል ሓዳርን ኣቦ ሓደ ቆልዓ እዩ ነይሩ::

#TPLF #TPLF_History #TPLF_Martyrs #Tigray_Martyrs

ስዉእ ተጋዳላይ ብርሃነ ገ/ህይወት (ሃንደበት) TPLF Martyr Brhane G/Hiwot (Handebet)

TPLF Martyr Brhane Handebet

ኣርቲስት ተጋዳላይ ብርሃነ ገ/ህይወት (ሃንደበት) ካብ ኣቡኡ ኣይተ ገ/ህይወት ኣባይን ካብ ኣዲኡ ወ/ሮ ሰላማዊት ገ/ህይወትን ኣብ 1960 ዓ.ም ኣብ ወረዳ ወርዕለኸ ከተማ ዕዳጋ ዓርቢ ተወሊዱ:: 

ኣብ ፀረ ደርጊ እጃሙ ንምብርካት ድማ ኣብ 1972 ዓ.ም ንሜዳ ወሪዱ ኣብ መስርዕ ህ.ወ.ሓ.ት ተፀንቢሩ::
ኣርቲስት ተጋዳላይ ብርሃነ ሃንደበት ኣብ መስርዕ ሰራዊት ህ.ወ.ሓ.ት ክዋጋእ ድሕር ምፅናሕ ኣብ 1974 ዓ.ም ንቃልሲ ህዝቢ ኤርትራ ንምድጋፍን 6ይ ወራር ቀይሕ ኮኾብ ንምፍሻልን ካብ ዝወፈሩ ተጋደልቲ ህ.ወ.ሓ.ት ሓደ ኮይኑ ብዝነበሮ ልዑል ወነ ኣብ ግንባር ናቕፋ ናብ ባህሊ ብርጌድ ተፀንቢሩ::
ኣርቲስት ተጋዳላይ ብርሃነ ሃንደበት "ወናም ብመትከል" ዝብል ደርፊ ብምድራፍ ተጋዳላይ ህ.ወ.ሓ.ት ካብ ራያ ተበጊሱ ናብ መስመር ሚሌ ዓሰብ ከጥቅዕ እንተሎ ንዝገጠሞ ፈታኒ ኩነታት ሽንቲ ግመል ሰትዩ ንሰሙናት ማይ እኽሊ ሓሪሙዎ ንዝሓለፎ ጉዕዞ ዘንፀባርቕ መላዐሊ ደርፊ ብምድራፍ ኣብ ተጋዳላይ ህ.ወ.ሓ.ት ፉሉይ ማሕተም ኣዕሪፉ ዝሓለፈ ከያኒ እዩ ነይሩ:: ወናም ብመትከል፣ ሓየተይ፣ ማዕበል፣ ናይ ሰላም ንጉስ፣ ቃልካ ሃብ ጉና፣ ለካቲት ወዘተ ብርክት ዝብሉ ወታደራዊ ደርፍታት ብምድራፍ ንሰራዊትን ህዝብን ኣብ ብምልዕዓል ዓቢ ግደ ፈፂሙ እዩ:: ሃንደበት ድሕሪ ውድቀት ደርጊ'ውን ኣብ ጉዕዞ ሰላምን ልምዓትን ኣብ ውሽጢ ዓድን ወፃእን ንልምዓት ከለዓዕል፣መንእሰይ ሕድሪ ኣያታቱ ክወርስ ብዘይ ዕረፍቲ ሰሪሑ እዩ:: ዋና ኢንስፔክተር ኣርቲስት ብርሃነ ሃንደበት ባዓል ሓዳርን ኣቦ 3 ቆልዑ እዩ ነይሩ::
#TPLF #TPLF_History #TPLF_Martyrs #Tigray_Martyrs

ስዉእ ተጋዳላይ ብርሃነ ዓንዳይ (ኩናማ) - TPLF Martry Brhane Anday (Kunama)

ተጋዳላይ ብርሃነ ዓንዳይ ካብ ኣቡኡ ኣይተ ዓንዳይ ካሳን ካብ ኣዲኡ ወ/ሮ ለተህይወት ወለላን ኣብ 1956ዓ.ም ኣብ ወረዳ ሸራሮ ጣብያ ለምለም ተወሊዱ:: ንኣካለ መጠን ምስበፀሐ ንስድሩኡ ብጓስነት እናጠወረ ድሕር ምፅናሕ ስርዓት ደርጊ ብሓፈሻ ኣብ ህዝቢ ትግራይ ብፍላይ ድማ ኣብ ብሄረሰብ ኩናማ ዘብፅሖ ዝነበረ ግፍዕን በደልን ኣዝዩ ይስመዖ ስለዝነበረ ብዕጥቃዊ ቃልሲ ከምዝፍታሕ ኣሚኑ ኣብ 1973 ዓ.ም ናብ ህ.ወ.ሓ.ት ተፀንቢሩ::
ተጋዳላይ ብርሃነ ዓንዳይ ኣብ ኣፅረጋ ፖሎቲካዊን ወታደራዊን ስልጠና ወሲዱ 1974 ዓ.ም ህዝባዊን ውድባውን ዕላምኡ ንምፍፃም 6ይ ወራር ደርጊ ንምምካት ናብ ኤርትራ ወፊሩ ጉቡኡ ፈፂሙ እዩ::
ኣርቲስት ተጋዳላይ ብርሃነ ዓንዳይ ክራር ሒዙ ኣብ ሰራዊት ባህሊ ኩናማ ይፃወት ስለዝነበረ ኣብ 1975 ዓ.ም ካብ ሰራዊት ናብ ክፍሊ ባህሊ ህ.ወ.ሓ.ት ተዘዋወረ::
ኣርቲስት ተጋዳላይ ብርሃነ ዓንዳይ ብናይ ኩናማ ጣዕመ ዜማ ወነ ሰራዊትናን ህዝብናን ኣብ ምልዕዓልን ኣብ ምዕቃብን ዝላዓለ ግደ ዝተፃወተ ኣርቲስት’ዩ:: ድሕሪ ምድምሳስ ደርጊውን ኣብ 1984 ዓ.ም ኣብ ዙርያ ባህሊ ህ.ወ.ሓ.ት ብሙኻን ኣብ መላእ ኣውሮፓን ኣሜሪካን ንስዱድ ወገኑ ንሱዱድ ወገኑ ብምልዕዓል ንውድብን ህዝብን ዘፀውዑ ስራሕቲ ዝሰረሐ ኣርቲስት እዩ::
ዋን ኢንስፔክተር ኣርቲስት ተጋዳላይ ብርሃነ ዓንዳይ ባዓል ሓዳርን ኣቦ ሰለስተ ቆልዑ እዩ ነይሩ::

#TPLF #TPLF_History #TPLF_Martyrs #Tigray_Martyrs

 —

ስዉእ ተጋዳላይ ተክኤ ተስፋማርያም- Martyr Tekie Tesfamariam

ኣርቲስት ተጋዳላይ ተክኤ ተስፋማርያም ካብ ኣቡኡ ኣይተ ተስፋማርያም በርሀን ካብ ኣዲኡን ወ/ሮ ምፅላል ሃይላይን ኣብ 1959 ዓ.ም ኣብ ወረዳ ታሕታይ ማይጨው ታሕታይ ጣብያ ሓምበራ ተወሊዱ:: ገና ዕድሚኡ ከይወንወነ ኣብ ውሽጡ ሰሪፁዎ ዝነበረ ናይ ምቅላስ ስምዒት ምስ ኣብ ከባቢኡ ዝነበሩ ኣሃዱታት ከራቢት ህ.ወ.ሓ.ት ኮይኑ ንህዝቢ የለዓዕልን የቃልስን ነይሩ:: ድሕሪኡ ኣብ መበል 13 ዓመት ዕድሚኡ ጠቕሊሉ ናብ ታዕሊም ህ.ወ.ሓ.ት ብምውራድ ስልጠንኡ ብምዝዛም ናብ ብርጌድ 51 ተፀንቢሩ :: 
ኣርቲስት ተጋዳላይ ተክኤ ተስፋማርያም ብዝነበሮ ክእለት ጭራ ኣብ ባህሊ ሪጅን 2 ተመዲቡ ኪነጥባባዊ ስራሕቱ ከቀላጥፍ ጀሚሩ:: ተጋዳላይ ተክኤ ንብርክት ዓመታት ንዝነበሮ ክእለት ጭራ ንኣሰር ስዉእ ኣርቲስት ገ/ፃዲቕ ብምኽታል ኣብ ነብሲ ወከፍ ተጋዳላይን ህዝብን ዝሰርፅ ቃና ሙዚቃዊ ጣዕሚ ጭራ ብዘስቆንቅን ኣግባብ ብምፅዋት ካብ ጊዜ ኲናት ክስብ ዕለት መስዋእቱ ክቃለስ ፀኒሑ:: ዋና ኢንስፔክተር ኣርቲስት ተጋዳላይ ተክኤ ኣቦ ሓንቲ ቆልዓ እዩ ነይሩ::

ስዉእ ተጋዳላይ ሃይለ ገ/ስላሰ -Martyr Haile G/Silase

ኣርቲስት ተጋዳላይ ሃይለ ገ/ስላሰ ካብ ኣቡኡ ኣይተ ገ/ስላሰ በርሀን ካብ ኣዲኡን ወ/ሮ ኣብረሀት ወልዱን 1959 ዓ.ም ኣብ ተምቤን ከተማ ዓቢ ዓዲ ተወሊዱ:: ብዝነበሮ ናይ ቃልሲ ወነን ድልየትን ኣብ 1981 ዓ.ም ናብ መስርዕ ህ.ወ.ሓ.ት ተፀንቢሩ:: 
ኣርቲስት ተጋዳላይ ሃይለ ገ/ስላሰ ብዝነበሮ ሞያን ክእለትን ኣብ ባህሊ ህ.ወ.ሓ.ት ኣትዩ ጉቡኡ ፈፂሙ እዩ:: 
ኣርቲስት ተጋዳላይ ሃይለ ገ/ስላሰ ኣብ ናይ ባህሊ ስራሕ ዘይክእሎ ዘይሰርሖ ስራሕ ኣይነበረን:: ተክኒሽያን፣ሳውንድማን፣ቤዝ ክራሪስት፣ኣሰልጣኒ ሳዕሲዕትን ፅባቐ መድረኽን ኮይኑ ብምስራሕ ደኺሙኒ ከይበለ ኣብ ጉዕዞ ቃልሲ ልምዓትን ዴሞክራስን ብዉፍይነት ዝተጋደለ ከያኒ እዩ:: ዋና ኢንስፔክተር ኣርቲስት ተጋዳላይ ሃይለ ገ/ስላሰ ባዓል ሓዳርን ኣቦ ክለተ ቆልዑን እዩ ነይሩ::
#TPLF History 

TPLF Martyr Revolutionary Eyasu Berhe ስዉእ ተጋዳላይ ኢያሱ በርሀ

ኢያሱ በርሀ Eyasu Berhe

ኣርቲስት ተጋዳላይ ኢያሱ በርሀ ብ1949 ዓ.ም ኣብ ከተማ መቐለ ተወሊዱ:: ቀዳማይን ካልኣይን ደረጃ ትምህርቱ ኣብ ከተማ መቐለ ዝርከብ ሃፀይ ዮሃንስ ራብዓይ ቤት ትምህርቲ ተማሂሩ::
ኣርቲስት ተጋዳላይ ኢያሱ በርሀ ኣብ ልዕሊ ህዝቢ ትግራይ ዝበፅሕ ዝነበረ በደልን ግፍዕን ብምቅዋም ቃልሲ መፍትሒ ሙዃኑ ኣሚኑ ብ 1967 ዓ.ም ናብ ተ ሓ.ህ.ት ተፀንቢሩ::
ኣርቲስት ተጋዳላይ ኢያሱ በርሀ ኣብ ከተማ ልእኽቶ ውድብ ድሕሪ ምፍፃም ሓምለ 5/1968 ዓም ናብ ሜዳ ወፀ:: ኣብ ሶበያ ምስ ተዓለመ ኣብቲ ከባቢ ንዝነበረ ህዝቢ ንክነቅሕ ፣ ክውደብን ክዕጠቕን ዓቢ ተራ ኔሩዎ::
ህወሓት ክፍሊ ባህሊ ምስ መስረተት ኢያሱ ኣብ ክፍሊ ባህሊ ህወሓት ኣሰልጣኒ ፣ ደራሲ ፣ ገጣሚ፣ ድምፃዊ ፣ ጉጅለ መራሒ ብምዃን ጉቡኡ ፈፂሙ እዩ:: ኣብ ብረታዊ ቃልሲ ህዝቢ ትግራይ ዝተደረፉ ደርፍታት 70% ብኢያሱ በርሀ ዝተገጠሙን ዝተዘየሙን እዮም:: ኣርቲስት ተጋዳላይ ኢያሱ በርሀ ዝደረፈን ደርፍታት ፖሎቲካዊ፣ ማሕበራዊ መልእኽቲ ዝለዎም ህዝቢ ዘንቀሑ ደርፍታት እዮም::
ኣርቲስት ተጋዳላይ ኢያሱ በርሀ ድሕሪ ውድቀት ደርጊ ኣብ ንግዲ ዓለም ኣትዩ እንዳሰረሐ ብፉሉይ ስነጥበባዊ ድማ ክእለቱ ህዝቢ ናብ ልምዓት ክዓስል: መናእሰይ ሕድሪ ኣያታቶም ክወርሱን ታሪኽ ኣያታቶም ክፈልጡን ብዙሓትን ዘይርስዑ ወየንቲ ደርፍታት ብምድራፍን ክሳብ ዕለተ ሞቱ ብዘይዕረፍቲ ዝተረባረበ ወዲ ህዝቢ እዩ ነይሩ::ጥሪ 10 2002 ህዝቢ ናብ ልምዓት ክዓስል ኣብ ከተማ ኣላማጣ ዝተዳለወ መደብ ኣርቲስት ተጋዳላይ ኢያሱ በርሀ ነቲ መድረኽ መሪሑ እቲ መደብ ምስተዛዘመ ድማ ብዝበፀሖ ሃንደበታዊ ናይ ልቢ ሕማም ዓሪፉ::
ኣርቲስት ተጋዳላይ ኢያሱ በርሀ ባዓል ሓዳርን ኣቦ 2 መናእሰይ እዩ ኔሩ::

#TPLF #TPLF_History #TPLF_Martyrs #Tigray_Martyrs #Eyasu 

ስውእቲ ተጋዳሊት ብርሽዋ ተጠምቀ - TPLF Warrior Martyr Brshwa Tetemqe . TPLF History

ተጋዳሊት ብርሽዋ ኣብ ዓዲ ኣርባዕተ ተወሊዳ:: እዋኑ ብሰንኪ መስፍናዊ ስርዓት ሃ/ስላሰ ህዝቢ ትግራይ ኣብ ዘስካሕክሕ ብሄራዊ ጭቆና ክነብር ዝተገደደ፣ ሰብኣውን ዲሞክራሲያውን መሰላቱ ዝተግሃሰ፣ ከርፋሕ ናብራ ድኽነት ንክነብር ዝተፈረደሉ እዋን’ዩ ነይሩ::
ኣብ መወዳእታ 1967 ዓ.ም ምዕባይ ብርሽዋ ዝኾነት ትርሓስ ተጠምቀ ዕድሚኣ እንተይኣኸለ ተመርዕያ ናብ ተሰነ ከደት:: 12 ዓመት ዝዕድሚኣ ብርሽዋ’ውን ምስ ዓባይ ሓፍታ ክትነብር ተልኣኸት:: ብሰንኪ ከርፋሕ ናብራ ቁልዕነታ ካብ ሓደ ዓዲ ናብ ካልእ ዓዲ እንዳዞረት ዘሕለፈቶን ኣብ ተሰነ እርሳስን ጥራዝን ሒዛ ፊደል ክትቆፅር ንደገኣፍ ቤት ትምህርቲ ክተረግፅ ዕድል ረኸበት::ኣብዚ ግዜ’ዚ ናይ ስዊድን ሚሽን ዘጣየሽዎ ቤት ትምህርቲ ስለዝነበረ መፃኢ ህይወታ እተማሓያሸሉን ፍልጠት ናብ እትቀስነሉ ቤት ትምህርቲ ኣትያ ሀ…ሁ ክትብል ጀሚረት::
እንተኾነ ግና ንሽግርን ንመከራን ጥራሕ ዝተፈጥረት ክሳብ ዝመስል ከም ማዓር ዝመቀረታ ትምህርቲ ሰሙን እንተይገበረት ናብ ቤት ትምህርቲ እንዳኸደት እንከላ ብዕጡቓት ጀብሃ/ተሓኤ ተገፊፋ ተወሲዳ:: ኣባላት ጀብሃ ንከተማ ተሰነ ተቆፃፂሮሞ ስለዝነበሩ ብኣስገዳድ ንመናእሰይ እናገፈፉ ዘጋድሉሉ እዋን‘ዩ ነይሩ:: ትርሓስ ንብርሽዋ ክትደሊ ን3 ወርሒ ከርተት እንዳበለት ዘይመስል መሰለት:: ኣብ መወዳእታ ካብቶም ኣባላት ጀብሃ ሓደ ሓፍትኺ ንዘላቶ ክነግረኪ ምእቲ ቕርሺ ክፈሊ ኢሉ ሓተታ:: ትርሓስ ካብ ምኽፋል ድሕር ከምዘይትብል ብምግላፅ ተለቂሓ፣ ንዝነበረኣ ወሳሲኻ ሚእቲ ቕርሺ ከፈለት:: እታ ክትማሃረላ ዝተፀበየታ ሓፍታ ጮግሪ ርእሳ ተላፅዩ፣ብረት ዓጢቓ ንዘይትፈልጦን ንዘይትደልዮን ዕላማ ክትዋጋእ፣ ኣብዕሸል ዕድሚኣ ወታደራዊ ታዕሊም እንዳወሰደት’ያ ረኺባታ:: ሕጂ ‘ውን ዝተኸፈለ ይከፈል ኢላ ንብርሽዋ ካብቲ ዘላቶ ክተውፅኣ ወሰነት::ልዕሊ ዓቕሚ ሰልዲ ከይሓቱዋ ብምሕሳብ ምእመኒዩ ንዝበለቶም ናይ ሓሶት ምኽንያታት ምሂዛ ናብቶም ሓለፍቲ ዝባሃሉ ኣባላት ጀብሃ/ተሓኤ ከደት:: ብርሸዋ ንምግዳል ዘይትበቅዕ ህፃን ኣብርእሲ ምዃና ወለዳ ዓይነስዉራት ስለዝኾኑ እሞ ድማ ብዘይ ንሳ ካልእ መራሒ ከምዘይብሎም ብምግላፅ ንክሰዱዋ ለመነቶም:: እቶም ኣባላት ጀብሃ’ውን ብርሽዋ ንሰለስተ ኣዋርሕ ክትፀንሕ ከላ ከምቶም ዕድሚኦም ዝኣኸሉ ተዓለምቲ ክኢላ ነቲ ዝዋሃባ ዝነበረ ታዕሊም ትፍፅም ስለዘይነበረት ናብ ገዝኣ ንክመልሱዋ ኣየማትኡን:: ካልኣይ ማዓልቲ ኣብ ደገ እንተተራእያ ኣሲሮም ናብታ ዝነበረታ ታዕሊም ከምዝወስዱዋን ፈፂሞም ከምዘይለቁዋን መጠንቀቕታ ብምሃብ ኣፈሪሞም ኣውፂኦማ:: ብርሽዋ ኣብ ተሰነ ክትማሃር ዝነበራ ዕድል ተዓፅዩ:: ብርሽዋ ኣብ ተሰነ ምፅናሕ ንትርሓስ ከቕስና ስለዘይካኣለ 1969 ዓ.ም ናብ ዓዳ ኣብፂሓታ ተመለሰት:: ኣብዚ ግዜ’ዚ ብርሽዋ ጓል 14 ዓመት ዝመለአት እንትትኮን ልቢ ዝገበረትሉን ንዘላቶ ከርፋሕ ናብራን ኣብ ልዕሊ ህዝቢ ትግራይ ዝበፅሕ በደላት ከሕስባ ጀመረ::
1969 ዓ.ም ውድብ ህ.ወ.ሓ.ት ኣብ ከባቢ ራማ ተንቀሳቐስ ስለዝነበረት ብርሽዋ ምስ ተጋደልቲ ክትቀራረብን ንመንነቶም ክትፈልጥን ዕድል ረኸበት::ተጋደልቲ ኣብ ልዕሊ ሰገናት ፍሉይ ፍቕሪ ዘሕድሩ ስለዝነበሩ ብርሽዋ’ውን ከምቶም ካልኦት ሰገናት ራማ ብፍቕሪ ተጋደልቲ ተፀመደት:: ቁምጣ ስረ ዓጢቓ ብረት ተሓንጊጣ ክትውይን ድማ ተመነየት::
ናብ ተጋደልቲ ህ.ወ.ሓ.ት እንዳኸደት ንከቃልሱዋ ክትሓትት ጀመረት:: ኮይኑ ግና ዕድሚኣ ስለዘይኣኸለት ሕቶኣ ተቐባሊነት ኣይረኸበን:: በቲ ዝተዋሃባ ምላሽ ተስፋ ዘይቆረፀት ብርሽዋ ኣብ 1969 ዓ.ም ህ.ወ.ሓ.ት ኣብ ከተማ ራማ ንምምሕዳር ዝተኸለትሉ እዋን ኣብቲ እዋን’ቲ ኣብዝተጣየሸ ማሕበር መናእሰይ ብርሽዋ ፈላሚት ኣባል እቲ ማሕበር ብምዃን ነቲ ውድብ መሰሰቶ:: መንእሰይ ራማ ናብ ቃልሲ ንክዓስልን ምስ ህ.ወ.ሓ.ት ንክውግንን ኣባል ባህሊ ማሕበር መናእሰይ ብምዃን ብዜማታት ቃልሲ እናጋወሐት ብምልዕዓል ልዑል ተራ ዝነበራ ብርሽዋ ጠርናፊት ፀጥታ ከተማ ራማ ንብረት ህዝቢ ከይዝረፍ ቀንዲ ተዋሳኢት ኮነት::
ብመሰረት’ዚ ወርሒ ግንቦት 1970 ዓ.ም ተጋደልቲ ጀብሃ ኣብ ራማ ዝነበረት ናይ ጀርዲን ቱቦታት ኢነትረ ብዝዓይነታ መኪና ፅዒኖም ዘሪፎም ክኸዱ እንትብሉ ኣብ እግሪ ጎማ እታ ንብረት ህዝቢ ፅዒና ክትወፅእ ዝተዳለወት መኪና ብምደቃስ “ናዓይ ረጊፅኩም እንተዘይኮይኑ ንብረትና ኣይትወስድዎን” ብምባል ህዝቢ ራማ ክሳብ ዝእከብ ገቲራቶም ፀነሐት:: ህዝቢ ራማ ንብረቱ ንከይዘረፍ ምስቶም ዕጡቓት ጀብሃ ተፋጠጠ : ኣባላት ጀብሃ ብረቶም ኣዕሚሮም ነቲ ህዝቢ ከፈራርሑ ፈተኑ:: ኣብዚ እዋን’ዚ ብርሽዋ ንሓደ ሲሞኖፍ ዝተዓጠቐን ንሳንጃ ብረቱ ገቲሩ ዝፍክር ዝነበረ ዕጡቐ ጀብሃ ብድሕሪቱ ከይዳ ንዝሓዞ ብረት መንዚዓ ምስመንጠለቶ ነታ ብረት ንመናእሰይ ራማ ኣቐበለቶም:: ክፍክር ዝፀነሐ ዕጡቕ ጀብሃ ብፍርሒ ማይ ይኸውን:: ብርሽዋ ኣብ ቅድሚኡ ተገቲራ “በል ናዓ ሕጂ” በለቶ:: ኣብ ቅድም ህዝቢ ዝተዋረደ ብረተይ ምለሱለይ እንዳበለ ኣብ ጥራሕ ሜዳ ናብ ልመና ኣተወ:: መናእሰይ ራማ ናብዝበፅሖ የብሉን ኢሎም ንብረቱ ደርበዩሉ:: ኣባላት ጀብሃ ሓሳቦም ፈሺሉ::
ደርግ ኣብ ሳልሳይ ወራር ከተማ ራማ ኣብ ኢድ ቁፅፅሩ ኣተወት:: ብርሽዋ ሕቶ ምግዳል ኣቕረበት:: ዋላኳ ዕድሚኣ ንምግዳል ዘብቕዕ እንተዘይነበረ ኣብ ራማ እንተፀኒሓ ክበፅሓ ዝኽእል ሕደጋ ማሕበር መናእሰይ ኮይና ንዝፈፀመቶም ስራሕቲ ኣብ ግምት ብምእታው ሕቶኣ ተቐባሊነት ረኺቡ::
ንቃልሲ ብዘለዋ ፅኑዕ ድልየትን ቆራፅነትን ከምኡውን ኣብ ፆታዊ ማዕርነት ዘለዋ እምነት ተሪር ኣብ ርእሲ ምዃኑ ንጋንታኣ ኣብ ዝወሃቡ መደባት ተሳታፊት ኣብ ምዃን ዘይትቕደም ውፍይቲ ብምንባራ ካብ ቦጦሎኒ 50 ሓሊፉ ኣብ ኩለን ሓይልታት ህ.ወ.ሓ.ት ተፈላጢት ኮነት::
ፀዋር ፣ ንፀገማት ዘይትንብርከኽ እያ ኔራ:: ኣብ እዋን ራብዓይ ወራር ፀላኢ ብፍላይ ኣብ ኲናት ደደቢት ዘርኣየቶ ፀዋርነትን ፅንዓትን ከም ኣብነት ዝላዓል እዩ::እቲ ውግእ ብፅዑቕ ደብዳብ ከበድቲ ኣፅዋራት ፀላኢ ዝተፈነወ ብምንባሩ ተጋደልቲ ህ.ወ.ሓ.ት ኣብዝዓረድሉ ቦታ ዝርከብ ሳዕሪ ስለዝተባርዐ ብመሬት ሓዊ፣ ብሰማይ ተፈጥራዊ ሓዊ ብቅድሚት’ውን ካብ ፀላኢ ብዝፍኖ ሓዊ ተኸቢቦም:: ካብ ታዕሊም ወፂኦም እኹል ምድላው ከይገበሩ ናብቲ ውግእ ዝኣተዉ ሓደሽቲ ተጋደልቲ ነቲ ዝነበረ ፃምእ ማይ ጥሜትን ፈታኒ ውግእን ክፃወርዎ ስለዘይካኣሉ ነቶም ነባራት ተጋደልቲ’ውን ክፀልዎም ክኢሉ እዩ:: ብርሽዋ ንሰለስተ ማዓልትታት እኽሊ እንከይጣዓመት ኣብ ማእኸል እቲ ርሱን ዓውዲ ውግእ ኣትያ ክትኳሻሕ ብምፅናሓ ከምቶም ካልኦት ተጋደልቲ እንተደኸመት’ውን ብጊዝያዊ ፀገማት ሸብረኽ ዘይብል ፅኑዕ ሓቦን ትብዓትን ነቶም ተወጊኦም ዝወደቑ ብፆታ ሓዚላ ናብ ሕክምና ዝረኽቡሉ ቦታ እንዳተማላለሰት ካብ ሞት ኣድሒናቶም እያ:: ደርጋውያን በቶም ውሑዳት ግን ድማ ፅኑዓት ተጋደልቲ ብዝገጠሞም ተሪር መኸተ ተፀፊዖም::
ኣብቲ ነዊሕ ጉዕዞ በረኻ ብዘጋጠመ ሕፅረት ማይ እተን ብዕድል ዝተረኸባ ውሑዳት ማይ ንኩሎም ተጋደልቲ ዝኣኻላ ስለዘይነበራ ንደቀነስትዮን ሰገናትን ጥራይ ተባሂለን በብጋንትኡ እንተተመቐላ’ውን እታ ግመል በረኻ ዝኾነት ብርሽዋ ግና ብፃምእ ማይ ጎሮሮኣ ነቒፁን ከም ዋልካ መሬት ፍግዕግዕ ኢሉ እንዳሃለወ’ውን ስተዪ ክትባሃል ከላ “ኣነ ዳሓን እየ ነተን ካልኦት ብፆት ሃቡወን” ብምባል ማዕረ እቶም ደቂ ተባዕትዮ ተጋደልቲ ማይ
ከይጣዓመት በቲ ልሙድ ፅንዓታን ቆራፅነታን ጉዕዞኣ ቀፀለት:: ብድሕሪ’ዚ ብርሽዋ ኩሉመደያዊ ብቕዓታን ተመዚኑ መራሒት ጋንታ ኮይና ንክትመርሕ ሓላፊነት ተወሃባ::
መራሕቲ ሓይሊን ቦጦሎኒን ንህፁፅ ኣኼባ ይፅወዑ:: ናብ ኤርትራ ጉዕዞ ስለዘሎ ምድላዋት ንክገብሩ ይነገሮም:: ብርሽዋ ተሓጒሳ:: “ኣነ ኣብ ኤርትራ እንተዝስዋእ ክንደይ ፅቡቕ ነይሩ” ብምባል ምስተዛረበት ንምንታይ ዝብል ሕቶ ካብ ብፆታ ቀሪቡላ እንትትምልስ ” ሓደ ወያናይ ሰራዊት ወያናይ ካብዘብሉዎ ሓደ ዓለምለኻዊ ግቡኡ ምፍፃሙ‘ዩ ይመስለኒ:: ኣነ‘ውን ንቃልሲ ህዝቢ ኤርትራ ንምሕጋዝ ግቡአይ ንምፍፃም ከይደ ኣብኡ ክስዋእ እንከለኹ ዝላዓለ ህዝባዊ ወገናውነትና ዘመስክር ታሪኽ’ዩ ዘለዎ” ብምባል ንብሱል ፖሎቲካቲዊ ብቕዓታ ብዘንፀባርቕ ኣገላልፃ እዩ ነይሩ ዘብርሃትሎም::
ቀይ ኮከብ ዘመቻ - ህ.ግ.ሓ.ኤ ንምብራስ
ደርግ ንኤርትራ ደምሲሱ ናብ ትግራይ ክምለስ ትልሚ ስለዝነበሮ ብዘይካ እቶም ኣብ ኤርትራ ዝነበሩ ሓይልታት ስፍሪ ዘይብሎም ሓደሽቲ ወታደራትን ከበድቲ ኣፅዋራት ናብ ኤርትራ ዘኽተቱሉ ብምንባሩ ታጋደልቲ ህ.ወ.ሓ.ት ምስ ተጋደልቲ ህ.ግ.ሓ.ኤ ብምትሕብባር ነቲ ናይ ሓባር ፀላኢ ሓቢሮም ክምክትዎ ከምዘለዎም ንኩሎም በራጊድ ምስተገለፀሎም ተጋደልቲ ህ.ወ.ሓ.ት ነቲ ሓሳብ ብሙልእ ድለየትን ወነን ምስተቐበሉዎ እዩ ብእግሪ ናብ ኤርትራ ጉዕዞ ዝጀመሩ::
ብርሽዋ፣ጓል ፀሃየ፣ ኣበባ ፋራን ካልኦትን ብርክት ዝበላ መራሕቲ ሓይሊ ናብ ግንባር ባርካ ተመዲበን:: ፀላኢ ንወራር ኣብዝተንቀሳቐሰሉ እዋን ነቲ ወራር ንምምካት ኣብ ዝተካየደ ውግእ ኣባላት እታ ብርሽዋ ትመርሓ ሓይሊ ፀላኢ ብምዝባጥ ዝላዓለ ዓወት ክሓፍሱ ክኢሎም ‘ዮም:: ኣብ ባርካ ዝተኻየደ ውግእ ኣዝዩ ከቢድ እንተነበረኳ ብውሕሉል ወታደራዊ ሳይንስን ጥበብን ነቲ ወራር ኣምኪኖምዎ እዮም::
ሚያዝያ 1974 ዓ.ም ብርሽዋ ካብቲ ንሓይላ ሒዛ ዝዓረደትሉ ግንባር ሕዳይ ትኽስ ናብዝተባህለ ቦታ ተፀዊዓ ትኸይድ:: ምስ ወታደራዊ መራሕቲ ህዝባዊ ግንባርን ከምኣ ካብ ዝተፋላላዩ ነቑጣታት ተፀዊዖም ዝመፅኡ ወታደራዊ መራሕቲ ህ.ወ.ሓ.ት ተራኺቦም ኣብ ሓውሲ በዓቲ ኮፍ ኢሎም ንኩነታት እቲ ከባቢ እንዳፅነዑ፣ ወታደራዊ ጉዳያት ሓሳብ እንዳተለዋወጡ እንዳሃለዉ ፀላኢ ብዘካየዶ ደብዳብ ከቢድ ብረት ናብታ ባዓቲ ሾሊኻ ብዝኣተወት ቁምቡላ ርእሳ ተወቐዐት:: ተጋደልቲ ካብቲ ዝወደቐትሉ ቦታ ኣልዒሎም ናብ ድፋዕ ምስኣእተዉዋ ሕክምና ንክትረክብ ምጉያይ ጀመሩ:: ግና ውቃዓ ከቢድ ስለዝነበረ ድሕሪ 15 ደቓይቕ “ዓወት ንውፁዕ ህዝቢ ዓለም ! ዓወት ንውድብና ! ክንዕወት ኢና !” ኢላ ምስጨረሐት ነቲ እትምነዮ ክቡር መስዋእቲ ከፊላ ሓለፈት::
#TPLF #TPLF_History #TPLF_Martyrs #Tigray_Martyrs

TPLF History ኦፕሬሽን ሽረ- 1967 ዓ.ም Operation Shire 1967

Suhul, Siyum Mesfin , Agazi , Qelebet , Berihu , Walta , Gerenchiel and Mussie

Operation Shire 1967 the first operation in the history of TPLF's struggle. Suhul, Siyum Mesfin , Agazi , Walta, Qelebet and Berihu to release Mussie (Mehari Tekhle) from the dictatorial regime of Mengistu Hailemariam's prison.

ኣብ መወዳእታ ወርሒ ሓምለ 1967 ዓ.ም ሸሞንተ ተጋደልቲ ተ.ሓ.ህ.ት ተልእኾ ሒዞም ኣብ ጥቓ ደደቢት ካብ ዝርከባ ምስቃል ቋንጣን ዓዲ ፀሓይን ተባሂለን ዝፅዋዓ ቁሸታት ተበገሱ::
እቲ ጉዕዞ ሰለስተ ተግባራት ንምፍፃም ዝዓለመ ነይሩ:: ሙሴ፣ስዩም፣ጃማይካ ኣብ ሞንጎ ተጋድሎ ሓርነት ህዝቢ ትግራይን ህዝባዊ ግንባር ሓርነት ኤርትራን ዝተጀመረ ርክብ ንምስላጥ ናብ ኤርትራ ንቕሎ ገበሩ:: ብካልእ ገፅ ድማ ስሑል ፣ ኣውዓሎም ፣ ንርአ ፣ ገረንችአልን ሓየሎምን መዋፈሪ ዝኸውን ቦታ ናይ ምፅናዕን ካብ ህዝቢ ድጋፍ ዝርከበሉ ኩነታት ናይ ምምችቻውን ተልእኾ ሒዞም ተጓዓዙ::
ሙሴ ፣ ስዩምን ጃማይካን ብኣባልነት ዝሓዘት ኣሃዱ ኣብ ጉዕዞ ዕንቅፋት ከይገጥማ ኣድላዪ ምምስሳል ገይራ እያ ትጓዓዝ ነይራ:: ሙሴን ስዩምን ሓለውቲ ከፍቲ መሲሎም በትሪ ጥራሕ ሒዞም ፣ ጃማይካ እትሰርሕ ምዃና ዘይተፈተነት ሽጉጥ ሒዙ ቀሺ ኮይኑ እናተጉዓዙ እዮም:: ዓዲ ፀሓይ ተባሂሉ ካብ ዝፅዋዕ ከባቢ ደደቢት ተበጊሶም ትጉዕዝ ውዒሎም መሬት ፅልግልግ እንትብል ዓዲ ዳዕሮ ኣተዉ:: ዓዲ ዳዕሮ ዝኣተዉሉ ቀዳማይ ምኽንያት ምስቲ ቃልሲ ርክብ ዝጀመሩ ስሩዓት ኣብ ዓዲ ዳዕሮ ስለዝነበሩ ምስኣቶም ንምርኻብ እዩ ነይሩ::
ምሉእ መዓልቲ ብዘይ ምግቢ ስለዝወዓሉ ጠምይዎም ነይሩ:: ኣብ ሓንቲ ንእሽተይ ቤት ብልዒ ኣትዮም እናተመገቡ እንተለዉ ሙሴ ንእሽተይ ጥዕም ኣቢሉ ተልዓለ:: ንጉዕዞኦም ዝኸውን ሸቐጥ ክገዝእ ኣብ ጥቓ’ታ ቤት ብልዒ ናብ ዝነበረት ሹቕ ኣተወ:: ስዩምን ጃማይካን ኣብቲ ቤት ብልዒ ኮይኖም እናተፀበዩዎ እንተለዉ ኣብ ደገ ጫው ጫው ዝብል ናይ ብዙሓት ሰባት ድምፂ ተሰምዐ:: ስዩምን ጃማይካን ካብቲ ቤት ብልዒ ወፂኦም ናብቲ ጫው ጫው ዝተሰምዐሉ ቦታ እንትፅግዑ ሙሴ ብነጭለባሽ ተታሒዙ ፀንሖም ሽዑ ድማ “ በይኑ ኣይኮነን …ቀሺ ነይሮም ምስኡ…” ዝብል ድምፂ ሰምዑ:: ጃማይካ ስለዝተኸሸፈ ስዩም ነታ ምስ ጃማይካ ዝፀንሐት ሽጉጥ ሒዙ ናብቲ ቦታ ተፀጊዑ ክትኩስ’ሞ ሙሴ ናይ ምምላጥ ዕድል ክረክብ ኣብ ዝብል ተሰማሚዖም ተፈላለዩ:: ስዩም እትሰርሕ ምዃናን ዘይምዃናን ዘይተፈተነት ሽጉጥ ሒዙ ናብቲ ቦታ ኣብ ዝተንቀሳቐሰሉ ቅፅበት ሓጎስ በርሀ ዝተብሃላ ነጭለባሽ ንሙሴ ሒዙ ናብ ዓዲ ዳዕሮ ፖሊስ ጣብያ ኣእተዎ::
ኣብቲ ምሸት ሓያል ዝናብ ይወቅዕ ስለዝነበረ ስዩምን ጃማያካን በብወገኖም እናተዳለዩ ከይተራኸቡ ሓደሩ:: ምስ ወግሐ ጃማይካ በቲ ናብ ዓዲ ዳዕሮ ዝኣተወሉ መንገዲ ገይሩ ናብ ደደቢት ተመለሰ:: ስዩም ኣብ ሓደ ፀግዒ ናይታ ከተማ ኣብ ዝነበረ ፍራስ ቤት ትምህርቲ ተኸዊሉ ምስኣርፈደ ኣብ ዓዲዳዕሮ ምስ ዝነበሩ ኣባላት ስርዒት ተራኺቡ ሓበሬታ ኣከበ:: ንሙሴ ናብ ሽረ ክወስድዎ ከምዝተዳለዉ ምስፈለጠ ናብ ደደቢት ተመሊሱ ምስቲ ኣብ ደደቢት ዝፀንሐ ኣመራርሓ መኸረ:: ኦፕሬሽን ኣካያድና ነፍትሓዮ ዝብል ውሳነ ተወሰነ::
ብመሰረት እቲ ውሳነ ድማ በሪሁ፣ ስዩም፣ቀለበት፣ዋልታ፣ ተኽለ ሸሪፎ ፣ ሰመረ ፣ ኣስገደ ፣ ሕሉፍ ፣ ኣረጋይ መፍቱሕ ፣ ብርሃነ ሸውሸው፣ገብረዝጊሄር ገብረ ነተን ኣብ ሜዳ ዝነበራ ውሑዳት ብረት ሒዞም ተበገሱ::
ስሑል ፣ ኣውዓሎም ፣ ንርአ፣ ሓየሎምን ገረንችአልን ዝተዋፈርሉ ተልእኾ ንምፍፃም ኣብ ማይ ሓራ ኣብ ዝተብሃለ ከባቢ እናተንቀሳቐሱ እንተለዉ ሙሴ ብፖሊስ ተታሒዙ ናብ ሸረ ከምዝተወሰደ ስለዝሰመዑ ንርአ ነቲ ሓበሬታ ከጣልል ብማይን በረድን እናተቐጥቐጠ ናብ ከተማ ሽረ ተበገሰ:: ንርአ ለይትን ቀትርን ተጓዒዙ ሙሴ ተኣሲሩ ከምዘሎ ኣረጋጊፁ እኳ እንተተመለሰ እቲ ሓያል ማይን በረድን ስለዘድኽሞ ክንቀሳቐስ ኣይካኣለን:: ሓየሎም ናብ ካልእ ገድላዊ ውራይ ስለዝተላኣኸ ምስኣቶም ኣይነበረን:: ምስተመለሰ ይስዓበና ዝብል መልእኽቲ ሓዲጎም ስሑል ካርባይን ሒዙ : ኣውዓሎምን ገረንችአልን ጥራሕ ኢዶም መጥቃዕቲ ኣካይዶም ንሙሴ ሓራ ከውፅኡ ተንቀሳቐሱ::
ኣብ ጉዕዞ ውዒሎም ንምሸቱ ሩባ ጨዓመስከበት እንትበፅሑ ሩባ መሊኡ ፀንሖም:: ሩባ ኣይንሰግርን ኢሎም ጉዕዞኦም ኣየመናገዉን ፣ ለይቲ እዩ ኢሎም’ውን ሰጋእ ኣይበሉን:: ኢድ ንኢድ ተተሓሒዞም ንምስጋር ብጋድም መስርዕ ናብ ሩባ ጨዓመስከበት አተዉ::
መሊኦም ክሰግሩ ቁሩብ ምስተረፎም ጋሻ ውሕጅ ኣርከቦም:: ሕጊ ተፈጥሮ ሓያል ምዃኑ ዝተራኣየ’ውን ሽዑ’ዩ:: ሓዊ ብማይ ተሰኲኑ:: እቲ ካብ ከውሒ ዝተረረ ሓቦ ዘለዎ ተጋዳላይ ዕድመ ከምዝደፈአ ተፈለጦ:: ጉላጉል ዝጥሕሳ ፣ እምባታት ዘርዕዳ ዝነበራ ኣብራኽ ብማይ ተሰኮና:: ስሑል ካብ ብፆቱ ተፈልዩ ፣ ጋሻ ውሑጅ እናጋፍዐኣርሒቑ ወሰዶ::
ብኣጋጣሚ ግና ካብ ሞት ተሪፉ:: ኣዝዩ ታሃስዩ ስለዝነበረ ጉዕዞ ክቕፅል ኣይካኣለን:: በዚ ምኽንያት’ዚ እታ ጉጅለ ዝሓሰበቶ ከይፈፀመት ተረፈት::
በሪሁ፣ ስዩም ፣ ዋልታ ፣ቀለበት፣ሰመረ፣ተኽለ ሸሪፎ፣ኣስገደ፣ሕሉፍ ፣ኣረጋይ መፍቱሕ፣ብርሃነ ሸውሸው፣ ገበረእግዚኣብሄር ገብረ ዝተብሃሉ ተጋደልቲ ብኣባልነት ዝሓዘትን ሰለስተ ኤምዋን፣ሓደ ክላሽንኮቭ፣ሓደ ማስ፣ ሓደ ካርባይን ፣ ሓደ ጓንዴ ፣ሓደ ሽጉጥ ፣ ሰለስተ ቦምብ ኢድ ዝዓጠቐትን ኣሃዱ ካብ ምስቃል ቋንጣ ተበጊሳ ኣብ ከባቢ ሽረ በፅሐት:: ኣብ ካልእ ውድባዊ ውራይ ተዋፊሩ ኣብቲ ከባቢ እናተንቀሳቐሰ ዝፀንሐ ኣግኣዚ’ውን ናብታ ኣሃዱ ተፀምበረ::
እታ ኣሃዱ ኣብ ወሰን ከተማ ምስበፅሐት መቐሎ ዕዮ ገበረት:: ነፍሲ ወከፍ ተጋዳላይ ነናይ ባዕሉ ስራሕ ተውሃቦ:: ገሊኡ ኣብ ከተማ ኣትዩ ሓበሬታ ክእክብ፣ ገሊኡ ድማ ንመቐለ ኣብ ዝወስድ መንገዲ ኣኻሲዱ ኣብ ወሰን ከተማ ክፀንሕ ተመደበ::
ከተማ ሽረ በቲ ብዘይምቁራፅ እናዘነበ ዝወዓለ ዝናብ ሓምለ ጠልቅያ ነይራ:: ነባሪ እታ ከተማ ካብ ዝናብ ክሃድም ፀሓይ ቅድሚ ምፅዳቓ በብገዝኡ ሰፊሩ’ዩ:: ንጀመርቲ ቃልሲ ናብ ደደቢት ምስናይ ጀሚሮም ምስገድሊ ዝተዛመዱን ኣብ ምቕባል ስንቂ ርኡይ ተራ እናተፃወቱ ዝመፁን ኣይተ ገ/መድህን መሰለ ዝተብሃሉ ነባሪ እታ ከተማ መሾምቦባ ዝሓወሰ ሓያል ዝናብ ዝፈጠሮ ዛሓሊ ስለዘቋረሮም ሓዊ እንዳሳሓኑ ኣብ ገዝኦም እዮም ነይሮም::
ሰዓት ክልተ ናይ ምሸት ምስ ኮነ ካብቶም ናብ ደደቢት ዝሰነዩዎም ተጋደልቲ እቶም ሰለስተ ጨጉሪ ለወጥ ኮይኖም ኣተዉዎም:: በሪሁ ፣ ስዩምን ቀለበትን እዮም:: ዝተጎሳቐሉ መሲሎም ተረኣዮዎም:: ኣብ ግንባሮም’ውን ኣይካኣሉን:: <<ሙሴ ብፖሊስ ተታሒዙ ስለዘሎ ፣ ናብ ፖሊስ ጣብያ ኪድ’ሞ ኩነታት ኣፅኒዕኻ ምፃእ>> በልዎም::
ኣይተ ገ/መድህን ኣብ ዙርያ ፖሊስ ጣብያ ዛዊኖም ኩነታት ኣጨናጪኖም ጥሉል ዘረባ ሒዞም ተመለሱ:: ሙሴ ኣብ ኢዱን እግሩን መቑሕ ኣትይዎ፣ ኣብ ሓደ ክፍሊ ንብሕቱ ተኣሲሩ ከምዘሎ ኣረጋጊፆም ነገርዎም:: ስዩም ዕቡድ መሲሉ ፣ በሪሁ ቀሺ መሲሉ ፣ ኣግኣዚን ቀለበትን’ውን ኣድላዪ ምምስሳል ገይሮም በብወገኖም ኣብ ዙርያ እቲ ቤት ማእሰርቲ ኮሊሎም ዝኣከቡዎ ሓበሬታ’ውን ልክዕ ከምቲ ናይ ኣይተ ገ/መድህን እዩ ነይሩ::
ንፅባሒቱ ኣብ ዝነበረ ወጋሕታ ኣይተ ገ/መድህን ናብ መዋፈሪ ኣውቶብስ ከዱ:: ሰበስልጣን ፖሊስ ጣብያ ሽረ ንሙሴ ናብ መቐለ ክወስድዎ’ዮም ዝብል ሓበሬታ ተረኺቡ ስለዝነበረ ነዚ ንምፅራይ’ዩ ነይሩ ኣካይድኦም:: በቲ ዝገበርዎ ምክትታል ኣዘዝቲ ፖሊስ ጣብያ ንሙሴ ናብ መቐለ ናይ ምልኣኽ ሓሳብ እኳ እንተሃለዎም በቲ ዕለት ከምዘይለኣኽዎ ፈለጡ:: ቀለበትን ኣግኣዚን ዝኣከብዎ ሓበሬታ’ውን ከምኡ’ዩ ነይሩ::
ኣይተ ገ/መድህን ካብ መዋፈሪ ኣውቶብስ ተመሊሶም ናብ ፖሊስ ጣብያ ከዱ:: አዒንቶም ካብቲ ቤት ማእሰርቲ እንተይነቐሉ ኣብ ምክትታል ወዓሉ:: ስዩም ተመሳሳሊ ተግባር እንትፍፅም ሪኦም”ዮም:: ይኹን’ምበር ምፅንታው ኣይገደፈን:: ብናይ ባዕሎም መንገዲ ዝረኸቡዎ ሓበሬታ ሒዞም ምሸት ንምሸቱ ናብ ገዝኦም ተመለሱ:: ክልተ መዓልትን ለይትን ምግቢ ዝበሃል ንዓይኖም ዘይራኣዩ ተጋደልቲ ኣብ ወሰን ከተማ ከምዘለውን ቤት ማእሰርቲ ኣጥቂዖም ንሙሴ ሓራ ከውፅኡ ምዃኖም ዝፈለጡ’ውን ሽዑ’ዩ:: ነቶም ኣብ ወሰን ፅርግያ ኣብ ከውሒ ተፀጊዖም ዝነበሩ ተጋደልቲ ድራር ከብፅሕሎም ደለዩ:: ገዝኦም ግና ምሉእ ኣይነበረን:: ፀብሒ ድኣ ኣይነበረን’ምበር እንጀራ ግና ነይሩ’ዩ:: ሕሩጭ ሽሮ ብማይ በፅቢፆም ኣብ ልዕሊ እንጀራ ኣፍሲሶም ወሰድሎም:: ዝጠመዩ ተጋደልቲ ተዓንገሉ::
ንመፅናዕቲ ዝተዋፈሩ ስዩም፣በሪሁ፣ ቀለበት፣ ዋልታን ኣግኣዚን መፅናዕቶም ወጊኖም ነቶም ኣብ ከተማ ዝገደፉዎም ተጋደልቲ እንትምለሱ ሓደ ተጋዳላይ ጎዲሉ ፀንሖም:: ገረዝጊሄር ገብረ ምስ ብረቱ ከተማ ኣትዩ ተሰወረ:: ሓይሊ ሰብ ነከየ::
እተን ዝነበራ ውሑዳት ብረት’ውን ወሓዳ:: ናይ ገረዝጊሄር ምጥፋእ ዓቢ ስግኣት ፈጠረ:: ናብ ደርጊ ኢዱ እንተሂቡ እታ ንሙሴ ካብ ቤት ማእሰርቲ ክተናግፍ ዝተበገሰት ኣሃዱ ብምልእታ ኣብ ሓደጋ ክትኣቱ’ያ:: በዚ ምኽንያት’ዚ እቲ ወፍሪ ተደናጎየ:: እታ ኣሃዱ’ውን ኣብ ኣርዕተ ተመቒላ ክትሓድር ተገበረ::ብመሰረት’ዚ ድማ ስዩም ኣብ ከተማ ኣትዩ ተወሳኺ ሓበሬታ ክእክብ፣
ኣግኣዚ፣ ቀለበትን በሪሁን ድማ ሓደ ሽጉጥን ቦምብን ሒዞም ኣብ መዋፈሪ ኣውቶብስ ኮይኖም ክከታተሉ ፣ ሙሴ ናብ መቐለ ዝውሰድ እንተኾይኑ ከም መንገደኛታት ምስኡ በታ ኣውቶብስ ተሳፊሮም ክኸዱ’ሞ ኣብ ዝምቹ ቦታ ምስበፅሑ ዓጀብቲ ወቒዖም ከፍትሕዎ:: ኣረጋይ መፍቱሕ ንዋልታን ሰመረን በርሀ ሸውሸውን ሒዙ ካብ ከተማ ኣብ ናይ ክልተ ኪሎ
ሜትር ርሕቐት ተሓቢኡ ክውዕል:: ሕሉፍ፣ ኣስገደን ተኽለ ሸሪፎን እውን ብተማሳሳሊ ኣብ ወሰን ከተማ ሓዲሮም ክውዕሉ:: ንፅባሒቱ ምሸት ዝራኸቡሉ ቦታ ኣነፂሮም ተፈላለዩ::
ቀፂሉ ኣብ ዝነበረ መዓልቲ ሙሴ ናብ መቐለ ኣይተልኣኸን:: ስዩም፣ ቀለበት፣ኣግኣዚን በሪሁን ድማ ተወሳኺ መፅናዕቲ እናካየዱ ወዓሉ:: እቲ ዝኸድዐ ንደርጊ ኢዱ ከምዘይሃበ ኣረጋገፁ:: ሙሴ ዝተኣሰረሉ ቦታን ኣብ ሓለዋ ሓይሊ ፀላኢን እናፅነዑ ምስወዓሉ ንምሸቱ ናብቲ መራኸቢ ቦታ ከዱ:: ኣስገደ ፣ተኽለ ሸሪፎን ሕሉፍን ኣብ ዝተመደበሎም ሰዓትን ቦታን ተረኸቡ:: ዋልታ፣ሰመረ፣ ብርሃነ ሸውሸው ፣ ኣረጋይ መፍቱሕ ዝርከቡላ ጉጅለ ግና ጠፍአት:: ዝሐሸ ብረትን ዝበዝሐ ሓይሊ ሰብን ዝሓዘት ድማ ንሳ እያ:: ክሳብ ፍርቂ ለይቲ ተፀበዩዋ:: ከይመፀት ምስተረፈት ፀገም ከምዘጋጠማ ገመቱ::
ጊዜ ብዝኸደ ቁፅሪ ሓደሽቲ ፀገማት እናጋጠሙ’ዮም :: እታ 11 ኣባላት ሒዛ ዝተበገሰት ኣሃዱ ሽዱሽት ጥራሕ ሒዛ ተረፈት:: እቲ ዝነበረ 9 ብረት’ውን ናብ 4 ወረደ:: በቲ ዝርከቡ ሓይሊ ሰብን ብረትን ንሙሴ ካብ ቤት ማእሰርቲ ናይ ምንጋፍ ወፍሪ ከካይዱ ወሰኑ::
ፍርቂ ለይቲ ምስኮነ እቲ ዝተረፈ ተጋዳላይ ነተን ዝነበራ 4 ብረታትን 3 ቦምብን ሒዙ ገሊኡ ሃጂሙ፣ ገሊኡ ጎልባቢ፣ ገሊኡ መዛብዒ ኮይኑ ብዝላዓለ ጅግንነትን ቆራፅነትን ካብ 30 ደቓይቕ ኣብ ዝወሓደ ጊዜ ተልእኽኡ ብዓወት ዛዘመ:: ሙሴ ብጅግንነት ብፆቱ እንዳተሓበነ ናብ ውድቡ ተፀምበረ:: ተጋደልቲ ተ.ሓ.ህ.ት ነዚ ወፍሪ’ዚ እንትፍፅሙ ፍርቆም ዕጡቓት ፍርቆም ዘይዓጠቑ ሽድሽተ ተጋደልቲ ጥራሕ’ዮም ነይሮም:: ብወገን ደርጊ ግና 80 ፈጥኖ ደራሽ፣ 100 ዝኾኑ ፖሊስ፣ ከምኡ’ውን ብዙሓት ነጭለባሽ ኣብታ ከተማ ነይሮም::
እዝ ወፍሪ ኣብ ታሪኽ ብረታዊ ተጋድሎ ሓርነት ህዝቢ ትግራይ ብፍልማዊነቱ ቀዳማይ ቦታ ዝሓዘ ኣብ ርእሲ ምዃኑ ፅንዓት ቃል ኪዳን መትከል ዝተርኣየሉ ትእምርቲ ቃልስን ዓወትን ኮይኑ ኣብ ማህደር ተጋድሎ ቃልሲ ህዝቢ ትግራይ ሰፊሩ ኣሎ::
ፍልፍል:- ቅያ ተጋድሎ
#TPLF #WEYANE #TIGRAY #OPERATION_SHIRE#ETHIOPIA